Deur Frank Botha
Die vonnisoplegging van Julius Malema, EFF-leier, begin vandag in die landdroshof in Oos-Londen, en sal na verwagting teen Donderdag afgehandel wees. Dit volg ná Malema in September 2025 skuldig bevind is ingevolge die Wet op die Beheer van Vuurwapens op vyf aanklagte, insluitend die afvuur van ’n vuurwapen in ’n openbare gebied sonder genoegsame rede, die onwettige besit van ’n vuurwapen en die onwettige besit van ammunisie.
AfriForum het in Augustus 2018 strafregtelike klagte teen Malema aanhangig gemaak nadat hy verskeie skote met ’n vuurwapen afgevuur het tydens die EFF se vyfde verjaardagvieringe op 28 Julie 2018 by die Sisa Dukashe-stadion.
Volgens Jacques Broodryk, AfriForum se hoofwoordvoerder vir Gemeenskapsveiligheid, vra die staat onder meer vir minstens 15 jaar tronkstraf vir die onwettige besit van ’n vuurwapen. “Die landdros het reeds bewys dat niemand verhewe is bo die wet nie. Die vonnis moet nou ook, ongeag Malema se politieke status, die erns van die misdaad weerspieël.” AfriForum het ’n beslissende rol gespeel om te verseker dat hierdie saak voor die hof gebring is.
Sonder dié organisasie se ingryping en volgehoue druk, sou die saak moontlik nooit in die eerste plek tot verhoor gekom het nie. Die saak verteenwoordig ’n beduidende oorwinning in AfriForum se voortgesette pogings om die oppergesag van die reg te handhaaf en gelyke aanspreeklikheid vir almal te verseker.
