Woorde: Frank Botha
‘n Botsing by die kruising van Steve Bikoweg en Booysenstraat in Pretoria tydens ‘n beweerde versnelren, het Sondagaand die lewe van een persoon geëis en verskeie ernstige beserings tot gevolg gehad.
Volgens kapt. Johan van Dyk, polisiewoordvoerder, was ‘n Honda Ballade en Renault Kwid in die ongeluk betrokke. Die Honda het in ‘n noordelike rigting in Steve Bikoweg beweeg toe die Renault vanaf Boysenstraat die kruising genader het. “Daar word beweer dat die bestuurder van die Renault Kwid versuim het om ‘n stopteken te gehoorsaam,” sê Van Dyk. Ná die botsing het die Honda Ballade die pad verlaat en “teen ‘n lamppaal gebots”.
Paramedici het beseerdes na ‘n nabygeleë hospitaal geneem. Die passasier van die Honda Ballade is later in die hospitaal dood verklaar. Albei bestuurders het ernstige beserings opgedoen en het verdere behandeling ontvang.
Die twee mans in die Honda Ballade is as Willie Momberg en Phillip Bezuidenhout geïdentifiseer.
Luidens berigte, is Bezuidenhout Sondagaand dood verklaar, terwyl Momberg kritieke beserings opgedoen het. Hy word tans in ‘n intensiewesorgeenheid behandel. ‘n Saak van strafbare manslag word ondersoek.
